Ua lē talia e le tofa Panoa Tavita Moala le iuga a le Komisi o fanua na lau i le masina o Aokuso o le tausaga nei, lea ua ave ai eleele umia saoloto o loo nofoia e aiga uma o le nuu i alii ma faipule e faaauau ai le faiganuu e tusa o le iuga i le silia i le 100 tausaga talu ai, i taimi o pulega a Siamani.
Ua faailoa e lea matai i se feiloaiga na ia taloina ma tusitala, o le iuga ua taunuu iai le finauga i luma o le Komisi o fanua o le a tapena ai se isi lu’i e tuuina atu i le Faamasinoga Maualuga e faia ai se iloiloga faaletulafono.
Ua ia faailoa foi e ono oo lava lana finauga ua toe tapena i le Faamasinoga Maualuga a Peretania le Privi Council auā o le uluai faaiuga o le faatauina o fanua o le latou nuu e tagata muamua mai Tonga na faia le fefaataua’iga sa faapepa i le taimi o loo vaaia Samoa e Peretania
Le tofa Panoa Tavita Moala i le feiloaiga sa ia taloina ma tusitala.
Sa saili se finagalo o se matai o le afioaga e tusa o le finagalo o Moala Tavita i le mataupu a lo latou nuu ua taoto nei iai le faaiuga a le Komisi o fanua.
O le afioga Faletaogo Tupu Fofoga o loo faasa’osa’o ma tausia le nuu, na ia faaalia o se faaiuga ua maua ai le nonofo filemu o tagata o Saina.
Le afioga Faletaogo Tupu Fofoga o le matai Sa’o o le nuu o Saina.
O le Aso Sa nei e pei ona ia faailoa o le a faia ai le lotu faafetai a le afioaga i le malumalu o le ekalesia Metotisi i lo latou nuu.
O le a faafetaia ai le Atua ua iu manuia le gasegase a Malo sa feagai ma matai ma le afioaga.
O se lotu faafetai foi na faailoa e Faletaogo o le a ave ai se faamaulaloga i le faafeagaiga ona o futia ua sola ma ni vala na tutupu ai e mafua lava i le mataupu i eleele.
