O le itumalo o Palauli le Falefa poo Palauli 2 ua muamua ona mae’a faamatuu iai le tasi le miliona tala muamua o le poloketi a le Malo mo le atiina’e o nuu ma itumalo faapalota e 51 o le atunuu.

O le faaiuga o le vaiaso nei e faia ai le uluai seleselega a Palauli 2 e faalauiloa ai taumafaiga tau i le atina’e o faatoaga, ma totonu o le lotoifale o aiga ua mafai ona faatino talu ona amata faamatuu vaega tupe tai 425 afe o le tasi le miliona tala muamua i totonu o le tausaga faaletupe o loo faagasolo i le taimi nei lea e mae’a i le faaiuga o le masina fou o Iuni.

Le Failautusi o le Komiti o le fono faavae a le itumalo o Palauli 2 o loo tulai mai ai le afioga Leota Laki Sio Lamositele i le tofi faipule o le Minisita foi lea o le matagaluega o tina ma tamaitai atina’e o afioaga ma agafesootai, o loo iai le vaaia ma le faatinoina o le poloketi e tasi le miliona tala.

O le tala faatatau o le tupe mo le tausaga faaletupe o loo sosoo ai nei e amatalia i le masina o Iulai, o le a toe faataoto mai ai e le Malo le isi 51 miliona tala mo lea lava taumafaiga o le atina’e o nuu ma itumalo.

O lea tala faatatau autu o le tupe o le a folasia e le tamaitai Minisita o Tupe i le tauaofiaga a le Palemene e usuia i le Aso Lua o le vaiaso nei.