O le asosi a le ACOPA poo le mafutaga a tama ma teine tuai o le Kolisi o Avele i Aukilani, ua sauniuni atu nei a latou tapenaga auā le faamanatuina o le 100 tausaga talu ona faavae mai le Kolisi o Avele i Samoa.
O lenei mafutaga o loo aofia ai nisi o susuga i faafeagaiga sa a’otauina i totonu o lenei kolisi ae o lea ua tausia nisi o ekalesia.
O nisi o i latou o loo avea ma faauuluuluga o nisi o galuega ae faapea ai ma i latou ua matua lo latou soifua lea ua ova atu ma le tai fitusefulu tausaga.
O le tapenaga a le asosi ua amata ai a latou sailiga seleni, lea sa faatinoina i le Aso Toonai ua mavae i le hall a le Ekalesia Meotisi i Papatoetoe.
Na maualuga ma matie le faamoemoe o le asosi ona o le lagolagosua atu a nisi o asosi a tama ma teine tuai a nisi o aoga i totonu o Aukilani e pei o le aosi a tama ma teine tuai o le Kolisi o Samoa le SCOPA, o teine tuai a Sagata Maria le SMOCA, mafutaga a MALISI faapea ma le mafutaga a Sanele faatasi ai ma le lagolago malosi a aiga o le mafutaga faapea uo ma ē masani.
E oo mai le taimi na faamauina ai le tatou lipoti ua silia ma le $63,000.00 le maau ma le milomilosia a le mamalu o le atunuu, ae na ta’ua e le afioga i le peresetene ia Fata Reupena o loo agai atu lava le agalelei o le atunuu, ma e ono suia ai le fuainumera e pei ona faamauina.
E 75 sui o loo auai i totonu o le mafutaga a le ACOPA i Aukilani.
O le agaga faafetai foi lea a le afioga i le Peresetene o le mafutaga ACOPA ia Fata Reupena e fai ma fofoga molimoli o le aufaigaluega a le Atua o loo i totonu o le asosi faapea sui auai o le mafutaga e faafetaia ai le mamalu ma le paia o le atunuu aemaise o uo ma ē masani ma aiga ona o le tuu atu o le tau’au e lagolago malosi ai le faamoemoe o le asosi e pei ona faataunuuina ma le manuia.
