Ua tapena le Matagaluega tetele ma Felauaiga a le Malo o loo iai ma le vaaia o le Faalapotopotoga o Vaa a Samoa, i le taunuu mai i le faaiuga o le vaiaso nei o le vaa fou le Lady Samoa IV o le a faia malaga i le va o Samoa ma Amerika Samoa.

Ua faailoa mai e le Minisita le tofa Olo Afoa Fiti Vaai, o le Aso Lua asau ua faamoemoe e faatino ai le sauniga e faalauiloa aloaia ai le vaa fou, a  o lei faia lana malaga muamua.

O le vaa o le Lady Naomi lea o le a le toe faaaogaina o loo fuafua o le vaiaso fou lana malaga mulimuli e pei ona faailoa e le Minisita ina ua maua iai se fesootaiga. Ua faaalia foi e Olo ua iai le fuafuaga o le a faaaoga pea le igoa o le Lady Samoa IV, ona e taugata ma tele isi tupe a le faalapotopotoga o Vaa e faaalu pe a suia le igoa e pei ona sa iai muamua se fuafuaga e faatumau pea le igoa o le Lady Naomi. 

O se tasi o fuafuaga ua faailoa e le Minisita o loo iai ma le vaaia o auaunaga tau vaalele sivili, ua taunuu se manaoga o se kamupani i le atunuu o Siamani, mo le fia aumai o le latou auaunaga o vaalele laiti o le sami, mo malaga i le va o Samoa ma isi atunuu ma malaga foi i totonu o le atunuu.

Faaalia e Olo Afoa Fiti Vaai, o le amataga o le vaiaso na taunuu ai lea manaoga ma ua galulue ai nei lana matagaluega i le iloiloina o lea talosaga.

Afai ae taunuu lea fuafuaga ua faaalia e le Minisita o loo silasila e fausia se nofoaga i le vaega o loo iai le uafu o vaa faila i Matautu tai i Apia.