O le Aso Gafua asau le aso 7 o Novema i le ‘afa o le 3 i le vaveao taimi lea i Samoa ma Niu Sila o le a feiloai ai le aulakapi liki malosi a Tonga ma le tatou Toa Samoa, i le la taaloga o quarter finals i le Ipu o le lalolagi o loo faagasolo nei i Peretania.
E lumanai le taaloga lea ae muamua faia i le Aso Toonai le aso 5 o le masina fou lava lenei o Novema le taaloga muamua a le Manu Samoa ma le ‘au a Italia e faia foi i Peretania a o iai le tatou Manu Samoa i lana malaga taamilo i lea itu o le lalolagi o le a faia ai ana taaloga faitaulia e tolu.
Ae i tapenaga a le Toa Samoa ua faailoa i luga o upega tafailagi a le tatou aulakapi liki, o le laina i luma a Tonga e matua malosi, ma o loo matua tapena iai.
O loo iai le talitonuga o le faiaoga ma le pulega o le Toa Samoa, o le tasi lea o taaloga sili ona tāua ia latou sauniuniga i le malosi o le tino, ae sili i le mafaufau.
E le gata ina tapuaia e le atunuu lea taaloga tāua i le Ipu a le lalolagi i le lakapi liki, ae o le alofaiva o le tatou Manu Samoa 15 faapea le aulakapi taitoafitu a le Manu Samoa o le faaiuga foi o le vaiaso lenei o le a tausinio ai i le taamilosaga lakapi fitu faavaomalo i Hong Kong.
