Ua faailoa e le Peresetene filifilia fou o le Faamasinoga o Fanua ma Suafa le afioga Lesatele Rapi Vaai, ina ua mae’a ona faatauto i luma o le afioga i le Ao Mamalu o le Malo, o le a tapena le komisi o galuega a lea faamasinoga tāua a Samoa e faaleleia atili le latou tautua e tali atu ai i manaoga o le atunuu, aemaise o le faatinoga o galuega a faamasino.
Na ave ai foi ma le faamalo a le Peresetene fou i lē sa tauaveina le tofiga le afioga Fepuleai Atilla Ropati, i lona sao i le siitia o le tulaga o le Faamasinoga o Fanua ma Suafa i tausaga sa seei mai ai, ma o le a ia mulimulitaia foi ia suiga lelei, ina ia saga maualuga ai pea le tautua a lea faamasinoga o loo sulufai iai le atunuu i gasegase a malo a aiga ma nuu e faasino i suafa matai ma eleele faaleaganuu.
Na afea foi e le Peresetene ua filifilia ma aloaia lona tauaveina o le tofiga, Tulafono o le Faamasinoga o Fanua ma suafa o le tausaga 2020 ma teuteuga o le Faavae o lea lava tausaga, i lana molimau o ni tulafono sa faapea o le a faaleleia atili ai le tagofia o mataupu peitai na tulai mai ai ni vevesi, ma to’a ai galuega a lea faamasinoga.
Le afioga i le Peresetene fou o Faamasinoga o Fanua ma Suafa, afioga Lesatele Rapi Vaai, i se vaega o lana saunoaga ina ua mae’a ona faatauto na te tauaveina lea tofiga tāua.
O le afioga Lesatele Rapi Vaai e silia i le 20 tausaga o galue o se Peresetene o le Faamasinoga o Fanua ma Suafa, ma sa lagolago i lē sa avea ma Peresetene ma Faamasino Sili le afioga Patu Tiavaasue Falefatu Sapolu, a o vaaia galuega a le Faamasinoga o Fanua ma Suafa, e le Faamasinoga Maualuga.
