O le toe vavae ese o le pulega o falepuipui i totonu o le atunuu, o se tasi lea o tapenaga a le Matagaluega o Leoleo, Falepuipui ma le Ola Toe fuataina i le tausaga fou lenei, ina ia faatino pe a aulia le masina o Iulai o le tausaga fou 2024 e amata ai le isi tausaga faaletupe fou.

Ua faailoa lea tapenaga e le Komesina o Leoleo le susuga Auapaau Logoitino Filipo, ina ua amatalia galuega o le tausaga fou i se fono a le pulega a le matagaluega ma faatalanoa ai nisi o fuafuaga alualu mamao o lenei tausaga e aofia ai ma le toe vavae ese o le pulega o falepuipui.

Faaalia e le Komesina e le o se tulaga lelei le feagai o leoleo ma le suesueina o solitulafono ma molia tagata e masalomia, ona toe aafia lea i le faia o polokalame e toe fuataina ai o latou olaga, o lana saunoaga mai i se fesootaiga i le telefoni, e tatau ona ese se isi pulega e feagai ma lea tulaga tāua.

Na aveese le pulega o falepuipui mo ni tausaga, i le tuanai o tausaga e tele o i lalo o le vaaiga a le matagaluega a leoleo falepuipui ua i le atunuu, peitai o le solaaga tele na tulai mai ina ua siitia le falepuipui i Tanumalala a o i lalo o se pulega tuma’oti, na faia ai le faaiuga a le faigamalo sa iai e toe aumai le pulea ma le vaaia o falepuipui i le matagaluega o leoleo.

O le toe a’e o galuega uma a le Malo i le amataga o lenei vaiaso na fono ai le Komesina o leoleo ma lana pulega e faatalanoa nisi o mataupu autu ua faataoto e agai iai fuafuaga o lenei tausaga fou, ma e le gata i le tapenaina o le tuu ese o le pulega o falepuipui, ae ua silasila foi le komesina ma le matagaluega i tapenaga o le itu i le saogalemu ma le puipuiga o le fono tele a taitai o Malo o le Taupulega a Peretania tele, o le a usuia i Samoa i le tausaga fou, faapea ma le galuega ua faagasolo o le fausia o se Kolisi maualuga mo a’oa’oga faaleoleo le Police Academy lea ua faatuina i Tafaigata i se vaega o le fanua sa iai le falepuipui i tausaga ua tuanai.