Ua faailoa e le faipule o le itumalo faapalota o Sagaga 1 le afioga Loau Solamalemalo Keneti Sio, le iai o sona manatu o le a faaulu i leoleo se la tagi ma lona faletua, e mafua i se vevesi ma nisi o tauaiga o lona tuaa tina i Faleula e mafua i fanua.
O le aiga lea na faaumatia lo latou fale i se mu i le po o le Aso Lulu na te’a nei, ma faatama’ia ai lo latou fale ma meatotino e pei o taavale, ma ua tuua’ia ai e le aiga le vevesi na tupu e fesootai i le mu.
O le Aso Toonai na te’a nei i se faasalalauga i auala o fesootaiga a le vaega faaupufai e puipuia aiātatau a tagata na faailoa ai e le faipule o Sagaga 1 o lona faalagiga o le afioga i le Toe Taufanua a le Malietoa o le Sa’o lea o le afioaga o Faleula, sona finagalo na ia faamatala ai le mafuaaga o le vevesi ma nisi o le aiga o lona tina lea na ia faailoa o se mataupu i fanua o lo latou nuu.
O le afiafi po o le Aso Lua o le vaiaso na te’a nei na tupu ai le vevesi e pei ona faailoa e Loau, ae o le Aso Lulu i le po e pei ona faailoa ai e leoleo na faatama’ia ai i le mu le fale o le aiga na aafia i le vevesi, ma faaulu ai le tagi a le aiga i leoleo ma tuua’ia ai le faipule ma lona faletua i le faaoolima.
O le Aso Faraile na te’a nei na faailoa ai e leoleo le faia o moliaga o le faaoolima faasaga i le faipule ma lona faletua, faapea foi ona molia i le lafo o ni upu taufaamata’u.
O le tagi a le sui faipule ma lona faletua o le a iloa ai ni moliaga o le a faia e leoleo faasaga i nisi o le aiga ua faatama’ia le fale i le malaia.
O suesuega foi a leoleo e saili le mafuaaga o le mu pe na aafia ai se gaioiga solitulafono, o loo faaauau pea.
