Ua toe nei o galuega e aveesea ai taula u’amea mamafa o le manuao o le Manawanui o loo tapena le kamupani o loo totogi e le malo o Niu Sila e faatino, ona mae’a lea o galuega uma, ona taatia ai lea o le vaa i le ogasami o loo iai nei i Saute o Upolu, e tālia isi fuafuaga.
Ua faailoa lea tulaga lata mai i galuega ua mae’a ona aveesea ai suāuu masaa ma isi otaota mai le manuao o loo goto i gataifale i Saute o le motu o Upolu.
Ua mae’a foi ona aveesea a’upega ma ututau lea ua toe auina atu i Niu Sila e pei ona faailoa ai e le ofisa sinia o le fitafita o le puipuiga a Niu Sila o Commodore Andrew Brown i se pepa o faamatalaga faalaua’itele.
Ua faailoa ai foi e lea ofisa sinia le faatumau ai pea o le tapu o le uia lea o le 2 kilomita faataamilo o le ogasami o loo goto ai le manuao, a o tālia nisi feutana’iga i le va o le malo o Niu Sila ma Samoa.
Ua savalia nei le fitu masina talu mai Oketopa o le tausaga ua mavae na tula’i mai ai se faaletonu i lea manuao o Niu Sila ma goto ai i ogasami o le tatou atunuu.
