O le Iunivesite Aoao o Samoa i le Papaigalagala ua fuafua o le nofoaga lea o le a faatino ai le ‘ava faatupu mo le asiasiga taualoa a le afioga i le Tupu o le Malo o Peletania ma lana Masiofo o le a auai i le tatalaina o le Fono a Malo o le Taupulega i le masina o Oketopa.
I se pepa o faamaumauga o tapenaga o loo faagasolo mo lea fonotele na faamauina i le aso 23 o Ie masina na te’a nei o Iulai, o loo faailoa ai lea tapenaga o le a faia i le aso e sosoo ai ma le aso e tō’ai taunuu ai i Samoa le faigamalaga a le Tupu o Salesa III ma lana Masiofo o Carmilla.
O loo faailoa foi i ia faamaumauga o tapenaga nisi o polokalame o loo faatulaga e auai Lana Maiesetete e pei o se asiasiga i se nofoaga faasao o togatogo, ma se togalaau i se afioaga o le itumalo o Falealili.
Ua iai foi tapenaga mo se tali faaaloalo a le Tupu ma le Masiofo mo faauluuluga uma o Malo o le Taupulega ma latou usugafono.
O le fale mata’aga o loo manatua ai pea le alii tusitala Sikotilani o loo lagomau i le mauga o vaea o Lopati Lui Sitivinisone ua faamoemoe e avea ma nofoaga o lea tali faaaloalo a le Tupu o Salesa III ma lana Masiofo.
