O lea ua faataoto le polokalame a le komiti faafoe ma le aulagolago a le FAST i Aukilani i le latou polokalame e talimalo ai i le taunuu mai o le faigamalo o le Fast ia Novema i le faai’uga o le tausaga.
O lea polokalame o le patipatia lea o le alofa o le Atua ua aulia mai ai le 4 tausaga talu ona tula’i mai le faigamalo o le FAST latou te tauaveina le Sā o Samoa i lenei vaitau, faatasi ai ma le patipatia o le 4 tausaga ua aulia mai e le mafutaga a le aulagolago a le FAST i Aukilani nei.
O le aso 28 o Novema o lea ua faapolokalameina e le komiti e taunuu ai le malaga mai Samoa, ae o le aso 29 e faia ai le ‘a’va o le feiloa’iga a le malaga ma le mamalu o Samoa i Niu Sila i le maota o Samoa i Magele i le aso 10 i le taeao.
Ma o le aso foi lea e faataunuuina uma ai le tele o lauga a le mamalu o le atunuu auā le feiloa’iga e pei ona masani ai Samoa i aso faapenei.
O le aso 30 o le a faataunuuina ai loa le faamoemoe i le ASB STADIUM e pei ona malaga mai ai le aumalaga mai Samoa.
E $1,500 le tau o le laulau ae toasefulu tagata i le laulau e tasi, ma o le aso 4 o Oketopa o le aso mulimuli lea e faagata ai le faatauina o tickets.
Ta’ua e le afioga i le ta’ita’ifono ia Vaivaimalemalo Iopu ma le afioga ia Tupai Machetta Levy ua lē toe atoa se 20 o laulau o totoe i le taimi nei.
Ua iai tapenaga atoatoa ua ofoina i lea po auā le puipuiga o le aumalaga mai Samoa e pei ona iai sikulaki mo le saogalemu faapea foi taavale ambulance o le a tutū ai auā se faalavelave e ono tulai mai.
E lē o iloa se aofaiga o le aumalaga e ono malaga mai ae o loo iai le faamoemoe o le po lea o le aso 30 e iai sikulaki latou te faafeaoina atu le aumalaga i totonu ona sosoo lea ma le usuina o le vii o Samoa ona faagasolo lea o le polokalame faatasi ai ma ni siva Samoa o le a faataunuuina atu i le laulau.
