O le fale tifaga e tasi i Samoa le Apollo Cinema ua latou faailoa ai nei le tapena e faia le faaaliga faapitoa le premiere o le ata tifaga lauiloa o loo fiafia iai le toatele, o le Moana 2.
O le aso 27 o Novema i Amerika ae o le aso 28 lea i Samoa o le a faia ai lea faaaliga faapitoa i le nofoaga o loo iai le faletifaga o le Apollo i le taulaga i Apia, ma o le Aso Lulu le ogatotonu o lenei vaiaso ua tatala ai le faatauina o pepa a o lumanai le faaaliga muamua i le aso 28 o le masina nei.
O le suiga fou o le ata tifaga o le Moana o le a pu’eina e faaaogā ai tagata moni e faatinoa le tala, lea o le a autū i se alo tamaitai o le tatou atunuu o ia lea o Catherine Laga’aia.
O lona tuaa tamā o se tasi foi o tamafanau a Samoa sa aofia i nisi o ata faasolo i televise i Niu Sila ma Ausetalia o Jay Laga’aia.
O Catherine Laga’aia ma se tasi o tamafanau a Samoa ua lauiloa foi i le taaloga pii faapolofesa ma autū iai ata tifaga o Seiuli Dwayne Johnson o le a autū iai le ata o le Moana, ua faamoemoe e faato’ā faaali mo maimoaga lautele ia Iulai o le tausaga 2026.
