Ua silia ma le 30 tausaga talu ona fausia le faleaoga a le afioaga o Lalomalava mo alo ma fanau i le Aoga Tulagalua.
O le popolega ona ua tulaga lē talafeagai le fale o loo iai nei mo nai fanau, o lea na saili fesoasoani ai i le Malo o Iapani e tauala atu ana fesoasoani lea ua mafai ai ona sainia le $582,000 e amatalia ai lenei galuega.
O lenei fesoasoani o le a fausia ai le faleaoga fou e aofia ai le valu potu aoga, o se potu tusi, ofisa o le Pule Aoga, ofisa mo faiaoga ma falelēta’ua.
Saunoa le Susuga i le Faafeagaiga ia Sotiaka Roma o le faafetai i le Malo o Iapani mo lenei fesoasoani tele ua faamatuu mo lenei poloketi.
“E avea ai a’u ma sui o le Peresitene aemaise lo matou nuu o Lalomalava e faafetaia le agalelei o le Malo o Iapani e tusa ma le fesoasoani tau seleni mo le faatinoina o le galuega.
“E lē faagaloina lo outou agalelei mo alo ma fanau a le afioaga.”
Na ia ta’ua foi o loo galulue foi le afioaga e tusa ai o nai sailiga seleni e tua ai le galuega i nisi o vaega.
“Sa faatino lava sailiga seleni luga upega tafailagi sa maua ai se seleni feololo ae afai ae sili laititi i le seleni lenei na tuuina mai e le konokarate latou te fausiaina le galuega ia o le tiute na o matou ae afai o loo lava lenei fesoasoani ona leai lea o se vaega e popole ai.
“Ou te iloa o le tulaga lava lena o fesoasoani mai fafo e manaomia ai foi la latou lagolago ma le tatou pitolaau ina ia galulue faatasi.
“E le o maua le aso e amatalia ai lenei galuega ona o nisi o alafua e ao ina faatino muamua.
“Ae o le taimi lava ua tuuina mai i lalo o lenei fesoasoani ia mae’a le galuega i totonu o le 12 masina.”
E latalata i le 200 fanau aoga o loo aotauina i le aoga a le afioaga.
