O se tasi o faletaalo i le malae o taaloga faavaomalo i Tuanaimato o le a faia ai fusuaga tele a le kalapu taalo a le Malisi i le faaiuga o le vaiaso fou.
O ni fusuaga faavaomalo o le a fetaui ai au fusu faa-Amateur mai Fiti, Tonga Niu Sila ma Samoa, ae taualuga i uluai fusuaga faapolofesa a alo talavou lauiloa o Samoa ia Ato Plodziscki Faoagali ma Marion Faustino Ah Tong.
O ia fusuaga faapolofesa e pei ona faailoa e le komiti o loo tapenaina le faamoemoe sa tuu e faia i Ausetalia, peitai o le manao o ia alo o le atunuu e fia avea ma tama fusu e tauaveina le igoa o Samoa, o le mafuaaga lea o le la manao e aumai a la fusuaga e faia i lo tatou atunuu.
O le a fetaui i laua ma ni alii Fiti ua tai 20 a la fusuaga faapolofesa. O le faamoemoe lea o le kalapu taalo a le Malisi ua faaiu iai le latou polokalame o taaloga o lenei tausaga, lea sa tausinio ai ‘au eseese i taaloga lakapi iuni, lakapi liki, lakapi pa’i ma le netipolo.
