O le aso 26 o le masina fou o Me lea ua faatulaga e le faamasinoga e tuuina atu ai folasaga ma finauga faaiu a loia a itu o loo auai i le suesueina o moliaga solitulafono o le tau faaleaga o loo tuuaia ai le tamaitai o Tuifaasisina Perkin Sauvao poo Perkin Feagiai Headles, o se tagatanuu o Samoa e nofomau i Amerika.
O le toe faaauauina o molimau a leoleo i le aso 3 o Aperila na mae’a ai i le molimau a leoleo o se tasi e iai ona tomai i fesootaiga faatekonolosi e faasino i fesootaiga televavave faaonapo nei poo le social media.
O le masina o Oketopa o le tausaga na tea nei na amata ai ona valaau lenei mataupu i le faamasinoga faaitumalo, ma ua savali nei i le iva masina o taofia pea i Samoa lē o loo molia e faatoa mafai ona malaga ese, pe a mae’a suesuega ma aumai se faaiuga a le faamasinoga i ona moliaga.
