O le maua ai e tagata i Samoa, i latou e iai manaoga tumau poo disabilities o le faamanuiaga tupe e selau tala i le masina, o lea ua faailoa e le tamaitai Minisita o le Matagaluega o Tina ma Tamaitai, Atinae o Afioaga ma Aga Fesaootai o loo faasoaina mai lea faamanuiaga tau tupe i masina taitasi, e iai isi faamanuiaga faaopoopo o le a maua e tagata e iai o latou manaoga tumau.

Ua faailoa e le tamaitai Minisita le afioga Mulipola Anarosa Ale Molioo i auala o faasalalauga ma fesootaiga a le Malo, o le vaai o se fomai ma tala fua vai ma fualaau, faapea le feoai i vaa o le Malo e aunoa ma se totogi, o nisi ia o faamanuiaga faaopoopo mo tagata o le tatou atunuu e iai manaoiga tumau o le tino ma le mafaufau.

O le tapenaga o faamanuiaga faaopoopo o le a tuuina atu i le Kapeneta mo se latou faatofāla’iga ma faia iai se faai’uga.

O le tausaga e 2022 faasolo mai i le 2023 seia oo mai i le taimi nei na amata maua ai mo le taimi muamua le faamanuiaga tupe e selau tala i le masina mo tagata e iai manaoga tumau.

Afai ae maua ma le faamanuiaga o le tala fua o vai ma fualaau faapea le vaai o se fomai i auaunaga a le Malo e leai se totogi, ma feoai fua i vaa o le Malo, o le a laina tutusa loa faamanuiaga o le au penisione poo tamā ma tina matutua ua aulia le 65 tausaga o le soifua ma sili atu, ma tagata e iai manaoga tumau.