Ua tapena e le malo se polokalame mo le faafeiloai ai o le Kilisimasi ma le Tausaga fou e ala mai lea ile Pulega o Tagata Tafafao mai fafo, e pei ona faailoa se fuafuaga mo lea faamoemoe e amata ile aso Lulu o le vaiaso asau e oo ile aso Faraile, ao lumanai le Kilisimasi ile aso Sa 25 o Tesema.

E toe faaauau foi ile aso Lulu ile maea o aso malolo o le Kilisimasi, e tau atu ile aso 30 o Tesema ao lumanai le aso Sa muamua o Ianuari 2023 e pau tonu iai le tausaga fou. Ua faailoa e le Pulega o Tagata Tafafao o polokalame o le vaiaso fou mai le aso Lulu 21 o Tesema o le solo poo le parade o le kilisimasi e faia ile afiafi ile 5.

E sosoo ma polokalame o pesepesega o le kilisimasi ma faafiafiaga eseese e pei o faaaili kitara e faia ile nofoaga o loo i tuā maota o le malo ile eleele fou le Friendship Park. E faia ai foi i aso ia e tolu ma le maketi a le asosi a le au faifaletalimalo e agai iai le atunuu mo faatauga o taumafa ma isi oloa.

Ae mo polokalame e faafeiloai ai le tausaga fou o le a faaauau foi faafiafiaga o pesepesega ma le maketi ile poo le night market, ae taualuga i le faaaliga o mea faapāpā poo fireworks display. O le faaaliga foi o le a faia i Savaii ma e faia le faaaliga o mea faapāpā pe a maea le saunoaga faamanuia o le tausaga fou a le taitai o le malo le afioga ile tamaitai Palemia Fiame Naomi Mataafa.