Ua taatia le talanoaina e le Palemene o le saunoaga faaminisita a le tamaitai Palemia i ni mataupu sa aafia ai nisi o minisita o lana kapeneta, i se fono a le Palemene o lumanai.
O le finagalo lea o le Fofoga Fetalai susuga Papalii Li’o Oloipola Ta’eu Masipa’u e tali ai i le tulai o le Minisita o Faatoaga ma Faigafaiva i le fono usu o le Aso Lua o lenei vaiaso, ma ia faailoa lona naunau e fia tali i tuuaiga ma aafiaga o lona aiga.
Na faaalia e le Fofoga Fetalai e tele galuega o loo taoto a le fono aoao aemaise o lipoti a matagaluega ma faalapotopotoga tuma’oti a le Malo ua mae’a ona folasia ma ua fia talanoaina, ae o loo tau faasoasoa taimi o le Palemene e tagofia ai ia lipoti.
Le Fofoga Fetalai susuga Papalii Li’o Oloipola Ta’eu Masipa’u. Ua tolopo galuega a le fono aoao faitulafono e faato’ā toe tauaofia i le aso 22 o le masina o Aukuso.
