A o faagasolo ai pea galuega o le mata’itū o puipuiga o le gataifale o nuu tu lalata i le ogasami o loo goto ai le vaa su’esu’e o le fitafita o le sami o le Malo o Niu Sila le HMSNZ Manawanui, ua faailoa e le komiti o galuega fesoasoani i ni faaletonu e aafia ai le gataifale ma ogasami o Samoa, le faia ai nei o se tapu ua faasā ai ona toe fagotaina gataifale o nisi o nuu i le atu Safata o loo tau lalata i le ogasami o loo goto ai lea vaa su’esu’e.
I le lipoti a le komiti na tuuina faalaua’itele mai i le afiafi o le Aso Lua o lenei vaiaso ua faailoa ai, ua mae’a asia gataifale o nuu e pei o Tafitoala, o le tolotolo i Vaie’e, le afioaga o Salamumu, Nuusuatia, Lotofaga Safata ma Saanapu, ma ua molimauina ai e leai ni suāuu o lofia ai le gataifale mai le aloalo e oo i matafaga lauoneone o ia nuu.
Peitai o loo faaauau ona siaki ma mata’itū pea ni tulaga e tula’i mai i ni suāuu e vaaia i ogasami o ia afioaga.
O suāsami ma nisi o meaola o le gataifale o ia nuu ua tuuina atu i le nofoaga o su’esu’ega faasaienisi le SROS mo a latou sailiiliga.
O le taofia o le toe fagotaina o i’a ma figota i nisi o nuu o lea faaitu o le motu o Upolu ua faaalia i le lipoti lata mai a le komiti, o se itu mautinoa ua taofia ai tupe maua a aiga o loo faalagolago i le atina’e o faigafaiva, aemaise o le itu i taumafa mo le tausiga o le soifua manuia o le tino i aso uma.
Peitai o loo ave le tuualalo i ia afioaga e lava papale a o faatino galuega mo le faamautinoa ai o le saogalemu o le si’osi’omaga o le gataifale mai suāuu masaa ona o le vaa ua goto i ogasami i Saute o Upolu.
E tusa ma le 90 aiga i le atu Safata ua oo iai le galuega sa faatalatalanoa ai ma faamalamalama itu e tatau ona latou silafia, ma o loo faaauau pea ia feiloa’iga ma faatalatalanoaga.
O loo fautuaina foi aiga ma tagata o lea faaitu o le atunuu ina ia faailoa atu ni vaaiga i ni suāuu masaa ma ni otaota mai le vaa ua goto e molimauina i o latou gataifale.
