O le fono a le Kapeneta i le Aso Lulu na te’a nei na faia ai le faai’uga e taofia malaga i atunuu i fafo a faauluuluga ma tagata faigaluega sinia uma a le malo e aofia ai Minisita o le Kapeneta ma Minisita Lagolago, se’i mae’a ona pasia le tala faatatau autū o le tupe a o le’i mae’a le masina nei o Oketopa.
O lea faai’uga ua faia ina ia tuu atoa ai le tapenaga a le malo i le tala autū o le tupe e pei ona faailoa e le Minisita o le Matāgaluega o Tupe a le malo.
E pei ona silafia o loo faagaioi galuega a le malo e aofia ai ma totogi o le aufaigaluega uma a le malo i le fuafuaga tau tupe faanatinati poo le emergency budget lea e ta’i vaiaso ma ave le auivi o tupe faaalu e faamaonia mai e le Ao o le Malo, o se faiga ua fuafua e mae’a i le aso 30 o Oketopa, lea e tatau ona oo atu iai ua pasia le tala autū o le tupe e le Palemene.
