Ua taofia e Niu Sila mo se taimi le tumau talanoaga e faatatau i aiātatau i le va ma Iran.
O le faaiuga lea a Niu Sila ua faamautinoa mai e le minisita o le va i fafo Nanaia Mahuta ma ua sau a o faia solo tetee i le tele o vaega o Iran e faailoa ai le teena e tagatanuu Iran o le maliu o le 22 tausaga lea na uma lona soifua a o i lalo o vaavaaiga a leoleo.
O tulafono foi a Iran o loo sauaina ai tagata tetee lea ua oo lava i le fasiotia.
I le vaai a Niu Sila, e le fetaui ma ua faia ai lea faaiuga ina ia ta’u atu ai ia Iran e le lagolagoina e Niu Sila le soli o aiātatau faaletagata soifua.
I se saunoaga mai le minisita, o mea o loo tutupu mai o loo atagia mai ai e le o iai se suiga e iloa ai o loo amanaia e Iran aiātatau a tagata soifua.
E ese mai i le faaiuga, ua faailoa mai foi e Mahuta o lea ua mae’a sainia e le taitai o le atunuu, Jacinda Ardern se tusi o loo ia valaau ai i Malo Aufaatasi ua tatau ona aveesea Iran mai le komisi a Malo Aufaatasi e mafua i le lē amanaia o tamaitai.
