Ua tālia nei se finagalo o le Pelesetene o le asosi o tusitala ma le aufaasalalau a Samoa e tusa o le faai’uga ua faailoa e le ta’ita’i o le malo le afioga i le Palemia i le feiloa’iga ma le autusitala i le Aso Gafua, ua taofia ai nei le toe auai o tusitala o le nusipepa o le Samoa Observer i fono ta’i vaiaso a le afioga i le Palemia susuga Laaulialemalietoa Leuatea Polataivao Fosi Schmidt.
O se faai’uga ua aofia ai ma le Kapeneta e pei ona tapu ai foi tusitala o lea nusipepa ona latou toe faatalanoa ma fesiligia minisita.
Le afioga i le Palemia susuga Laaulialemalietoa Leuatea Polataivao Fosi Schmidt.
Ua faailoa i se lipoti a le nusipepa ua faia iai le faai’uga a le Palemia, o le oo atu o le latou tusitala i le nofoaga o iai le maota o le Palemia i Siusega i le Aso Toonai e sa’ili se faamaoniga o le toe taliu mai o le ta’ita’i o le malo mai Niu Sila ina ua mae’a lana siiga gasegase, sa faaoolima ai se tasi o le aiga o le Palemia i le tusitala o le nusipepa.
Sa fautuaina foi e tuua le nofoaga ona ua latou solia le fanua i se auala solitulafono peita’i o le mau a le nusipepa i lana lipoti e le’i solia e le tusitala ma se isi tagata mai le nusipepa le fanua.
Sa tula’i ese le tama’ita’i tusitala o le nusipepa mai le feiloa’iga muamua a le Palemia ma tusitala i le Aso Gafua o lenei vaiaso, talu ona toe taliu mai i fanua i le mae’a o le valu vaiaso o faamautū i Niu Sila i lana siiga gasegase.
