Mai le aso 3 o Setema e oo mai i le amataga o lenei masina fou o Novema, o loo taofia pea e le ofisa o le tiute se uta o ni pailate o le avamalosi o meainu ua sui ua ta’ua o Wood stock bourbon e tusa ma le 400 katuni, ma ni pailate se 10 o pusa fagumalosi o le ituaiga o le Whiskey Johnny Walker Black label.

O se uta na aumai mai Amerika Samoa i se tasi o malaga a le vaa o le Lady Naomi e aunoa ma le faia o se pemita faataga. O le suesuega a le ofisa o le tiute e pei ona mae’a ma tuufaatasia ai se lipoti, o loo faailoa ai le suafa o se sui faipule i le aumaia o lea uta o avamalosi, ae o loo ta’ua foi i le lipoti e iai se tamaitai faipisinisi e iai se sootaga i le faipule na ia toe faailoa i le ofisa o le tiute, ia faamamā le suafa o le faipule ae o ia e ana le uta atoa.

O se solitulafono i lalo o tulafono o tiute le faaulufale mai i le atunuu o ni oloa e aunoa ma se pemita faataga aemaise oloa tau avamalosi e faaulufale e aunoa ma se pemita e pei ona aiaia i le tulafono o avamalosi.

A faamaonia se tasi ua na le usitaia, e faasalatupe i le selau iunite poo le nofosala i le falepuipui mo le 6 masina, poo le tuu iai o faasalaga uma e lua.

Ua fautuaina i le lipoti o le suesuega le taofia pea o ia oloa tau avamalosi sei vagana ua iai se pemita faataga ma totogi atoa le tau o le tiute.

Ua silasila nei foi i ni faasalaga talafeagai faasaga ia i latou ua aafia i le faia o lea solitulafono.