O le mea sa’o lava e fai i tagata e lei faatumuina pepa o le tusigaigoa o le taofi o penefiti.
O le aso 7 o Mati lea na faagata ai le faatumuina o pepa o le tusigaigoa a le atunuu peitai e tusa ma le 14% o tagata o lea lava e lei faia ma o lea ua toe taumafai le malo e ave fua iai pepa ulufale e o ai e matamata taaloga lakapi ina ia tosina mai ai e faatumu pepa o le tusigaigoa.
E lē sao i le mafaufau o le taitai o le ACT David Seymour le lē usiusitai ae o lea e maua fua faamanuiaga nei, ae o tagata ia na faamaoni e faatumu pepa o le tusigaigoa e leai se mea o maua.
Fai mai Seymour i le Aso Toonai, afai e le mafai ona faaavanoa se 10 minute e faatumu ai pepa o le tusigaigoa, e le tatau foi la ona tuu atu iai tupe mai le malo poo penefiti auā o le tusigaigoa lea e fua agai iai faaiuga a le malo.
E le gata ai la i penefiti ae ua fai mai foi Seymour e tatau foi ona taofi ma tupe a tamaiti o loo tauala mai i le Inland Revenue lea e ta’ua o Families tax credits.
O le finagalo o le taitai o le ACT, taofi seiloga e gauai mai e faatumu pepa o le tusigaigoa faatoa toe totogi lea iai o penefiti faapea tupe a tamaiti.
