O taiala e lima taitaiina ai faasalalauga e aofia ai ma ni faasalalauga tau pisinisi i totonu o Samoa o se tasi lea o manulauti tāua i le auaunaga a soo se tautua e pei o leitio, ma televise faapea luga o fesootaiga televavave.
O le tāua o ia taiala e le mafai ai i se faasalalauga ona faasese ni faamatalaga ma taitai sese ai ma tagata e silasila ma faitau i se faasalalauga faapisinisi.
Ua lipotia e le vaega faasalalau o le Talamua le taofi e le Pule Faatonu le afioga Lematua Gisa Purcell, o se faasalalauga faapisinisi a le kamupani telefoni o le Vodafone Samoa, ona ua taitai sese tagata i le faasalalauga, aemaise o tagata i fafo e le o ni Samoa ma e le malamalama i ni vaega o a tatou tu ma aganuu o loo faaaoga e faamatala ai le auaunaga a le kamupani i lea faasalalauga.
Ua faailoa e se sui o le kamupani o le Vodafone i lea lipoti, ua avatu le faatonuga a le Pule Faatonu e toe teuteu nisi o vaega o le latou faasalalauga o loo iai atugaluga, ma o loo taofia ai i se tulaga le tumau ona toe faasalalau i luga o auala o fesootaiga.
