Ua ta vavae ese nei ni sootaga o ē mautofi i le Malo e aofia ai minisita o le Kapeneta ma le kamupani o le Travel Focus i Hong Kong, e pei ona faailoa lautele e le taitai o le Malo i lana saunoaga faaminisita i le Palemene, e le talafeagai ona toe avea le Travel Focus ma sui o le pulega o tagata tafafao mai fafo na te faia ni faalauiloa mo Samoa i totonu o Saina ma atunuu Asia.

O le toe tauaofia o le Fono usu a le atunuu i le Aso Lua na tomua ai i le saunoaga faaminisita a le afioga i le Palemia, Fiame Naomi Mataafa, sa faailoa ai se finagalo o le Malo i mataupu e aofia ai le vaa o le Kite Runner mai Amerika Samoa na tele ai manatu faaalia ma fesili sa autu i le fia iloa, pe na faapefea ona uia ogasami o Samoa Tutoatasi e le vaa e aunoa ma ni pepa mai le uafu mulimuli sa iai poo le last port of entry.

Na faailoa ai foi se finagalo o le Malo i le mataupu i le malaga mulimuli mai Salelologa sa lē tuua lea uafu i le taimi e tatau ai, ae na tolo se’i mae’a le malaga taamilo a le aumalaga o tagata tafafao mai Saina sa asiasi i le motu o Savaii.

E pei ona silafia o le mafuaaga lea o le faatoese i se tulaga faalauaitele o le Minisita o le faalapotopotoga o vaa le tofa Olo Fiti Afoa Vaai.

I le vaa na malaga mai Amerika Samoa na faaalia e le tamaitai Palemia sa iai lape, ae o le fautuaga ua ave i auaunaga a le Malo e gafa ma mataupu faapea, ia loloto le silasila i le faatinoina o tiute tauave.

Na faaalia e le Palemia e leai se aafiaga o le saogalemu o le atunuu i le malaga mai o lea vaa, auā na siaki uma le uta e na o taumafa tuuaisa mo se faalavelave e pei ona mafua ai ona malaga mai i Apia.

O upu faaiu o le saunoaga faaminisita a le tamaitai Palemia o lona faamoemoe, afai ua lē atoatoa faaatoatoa, a lē tonu faatonu, a sese faasa’o.

Ua ia faailoa foi o ni lape poo ni sese i le tauaveina o le taitaiga o le atunuu e nofo i luga o le ulu o le Malo.