O le Aso Faraile 3 Me 2024 sa fesilafai ai Samoa i Aukilani ma le alii faipule ia Teanau Tuiono e faafofoga i lana pili tau faaofi i le Palemene o Niu Sila, le Restoring Citizenship Removed By Citizenship (Western Samoa) Act 1982 Bill, poo le tulafono taufaaofi e soloia ai le Citizenship (Western Samoa) Act 1982 lea sa aveesea ai faafuasei e Niu Sila sitiseni o tagata Samoa sa soifua mai le aso 13 Me 1924 e oo i le aso 1 Ianuary 1949. Tatala le link lenei e silasila iai: https://www.facebook.com/share/v/rALM1Vr2MoxbYkDT/?mibextid=w8EBqM
O lenei feiloaiga tāua sa auai le taitai o le Green Party, Hon. Marama Davidson faapea faipule ia Ricardo Menendez March ma Huhana Lyndon.
E lē gata i lea ae sa faapea foi ona auai ai le Hai Komesina o Samoa i Niu Sila, afioga Afamasaga Faamatala Toleafoa, ma le Konesula o Samoa i Aukilani le afioga ia Afemata Palusalue Faapo II.
O le mae’a ai o lenei fesagaiga aloaia, ua galulue faatasi ai nei le Pacific Leadership Forum (PLF) i Niu Sila, le Fono Faufautua a Samoa i Aukilani (SAC), ma le Mafutaga Soofaatasi a Faifeau Samoa (MSFS) i Aukilani i se isi tapenaga ma o le a galulue faatasi ai e lē gata o Samoa i Niu Sila nei, ae faapea foi Samoa i tafa e fia o le lalolagi.
O le vaiaso o muamua o le a faalauiloa ai lea fuafuaga e unaia ai finagalo tusitusia (written submissions), ae maise o finagalo tuu fofoga (oral submission).
O le manumanuga ona ua lē o toe umi se taimi o loo tuuina mai mo submissions.
Ua faatagisia ai le mamalu o Samoa, ekalesia, mafutaga, pisinisi ma ofisa faasalalau i soo se vaega o le kelope e tatou te galulue faatasi.
Afai e mafai ona e fesoasoani i lenei tapenaga tele, faamolemole e faafesootai mai Teleiai Edwin Puni i le imeli edwin@puni.co.nz poo le telefoni (+6421) 618-042 mo nisi faamatalaga.
O loo faapipii atu le kopi o le pili taufaaaofi a Teanau Tuiono faapea le pepa o faamatalaga e aofia ai taiala mo finagalo faaalia (written and oral submission).
O loo i lalo le link o loo iai faamatalaga uma mai le Palemene o Niu Sila mo le silafia: https://www.parliament.nz/en/pb/sc/committees-press-releases/have-your-say-on-the-restoring-citizenship-removed-by-citizenship-western-samoa-act-1982-bill/
