Ua tagi atu nei le taitai o le vaega faaupufai e puipuia aiātatau a tagata e ala i sana tusi talosaga ua ave i le failautusi o le faauluuluga foi, o le ofisa tutotonu o Malo o le Taupulega le susuga Patricia Scotland, e auina mai i Samoa ni sui o lona ofisa e faia se suesuega, i ni mataupu ua ia faailoa i lana tusi, e pei o le faaiuga a le Palemene ua faamalolo le tumau ai le susuga Tuilaepa L Sailele Malielegaoi, ma se tasi o faipule o lana faafaletui le tofa Lealailepule Rimoni Aiafi.

Ua moomia foi lea suesuega e le taitai o le vaega faaupufai o loo agaia le faigamalo a le Faatuatua i le Atua Samoa ua Tasi, e silasila foi se suesuega e faia i le lē faatautoina o faipule o lana pati faaupufai lea na talosaga i le faamasinoga sili a le atunuu ma aumai ai le poloaiga e faatauto i se taimi vave.

O le isi mataupu ua faailoa e Tuilaepa i le faauluuluga o le ofisa tutotonu o Malo o le Taupulega, o le faaiuga a le Palemene ua pasia ai ni teuteuga o Tulafono tumau, i lona finagalo tusitusia i lana talosaga ua tapu ai ona toe faaleo ni o la lagona i auala o fesootaiga.

Ae mo le silafia e le atunuu o loo faaauau pea feiloaiga a le taitai o le HRPP ma tusitala talu mai lea faaiuga a le Palemene e oo mai i le taimi nei.

Ua faailoa foi e Tuilaepa i lea talosaga, sa iai sana tusi na ave muamua i le faauluuluga ia Patricia Scotland ina ua iai tulaga le mautonu i upufai o le Malo i le mae’a o le palota tele, peitai na te lei maua lava se tali o lea tusi.

Ua faaalia e le taitai o le vaega e puipuia aiātatau tagata i lana talosaga i le failautusi o Malo o le Taupulega, ua faaaoga e le pati faaupufai ua tu nei i le foe o le pulea o le Malo, le numera fulisia ua ia umia i le Palemene e faia ai faaiuga ia te ia ma se tasi o ana faipule ua faaaoga ai le paoa i se auala solitulafono.

O le talosaga a Tuilaepa i lona tulaga taitai o lana pati faaupufai ua faamoemoe e tuuina atu foi i le asosi o Palemene a Malo o le Taupulega le Commonwealth Parliament Association.