Ua tutū faatasi pule aoga o kolisi maualuluga ma faatalosaga se fesoasoani a le malo. 

I se tusi ua maua e le leitio a Niu Sila o loo ta’ua ai e pule aoga o loo i totonu o le asosi, le mamafa o le avega o loo iai nei i luga o faiaoga atoa ai ma le faaauau ona lē a’ooga fanau. 

Ona o le Koviti faapea le fūlū ua tele ina aafia ai faiaoga ma fanau aoga, ua faatalosagaina ai e pule aoga le malo poo le ā sana fesoasoani i su’ega a le NCEA o lenei tausaga. 

O se tasi o pule aoga na saini i lea tusi o le pule aoga lea a le kolisi maualuga a Botany Downs i Aukilani Karen Brinsden ma ua ia ta’ua ua iai talavou ua faavaivai, ao le toatele ua leai se naunau ona o le faigata ona toe tau tulituli o le tele o meaaoga e tatau ona faamae’a. 

Ua iai manatu o se tasi o auala e fesoasoani ai i fanau aoga o le a su’e i le NCEA o le tuu mai i lalo o credits e tatau ona ausia. 

O le ā lava foi le faai’uga a le NZQA, e tatau ona vave fai. 

Saunoa le peresetene o le Auckland Secondary Principal’s Association, Greg Pierce, afai ae leai se gaioiga a le malo o le a pologa fanau o loo vaivai le taumafai. 

O lea tusi na tuuina atu i le minisita o aoga, Chris Hipkins faapea lona sui I le vaiaso ua sola.