Ua i luma nei o le faamasinoga sili a Samoa se isi talosaga a loia a Talalelei Pauga ua finauina ai le taofia o taualumaga mo moliaga o lea tagatanuu o Ausetalia o loo tuuaia i lona auai i se taupulepulega e tagatavale ai lē sa avea ma Palemia le susuga Tuilaepa Lupesoliai Sailele Malielegaoi.
O loo faavae lenei finauga e ala i se talosaga faaletulafono i ni mau ua tuuina atu e iloilo ma fai ai se faaiuga a le faamasinoga peitai o loo teena malosi e le itu a leoleo lea o loo tulai ai loia mai le Ofisa o le Loia Sili.
O le taimi nei o loo faatali le talosaga a Talalelei Pauga i Ausetalia e tatala ai tua i ni aiaiga ae ua silia i le tausaga o nofo taofia pea i le vaaiga a leoleo i lea atunuu.
I faamaumauga o pepa a le faamasinoga o loo faaalia ai le aafia o le mafaufau ma lagona o lē ua molia talu ona taofia ma ua talosagaina ai le
faia o se poloaiga e faamuta ai loa lea mataupu.
O le tali tetee a le itu a leoleo o loo finauina ai, o le moliaga ua faia o loo tumau pea ona aloaia faaletulafono ma o le tusi saisai na faatonuina ai le pueina o lē ua molia ma avatu faapagota i Samoa e tali i tuuaiaga na faia e tusa o malosiaga faaletulafono o le faamasinoga sili a le atunuu.
Ua faaalia foi le tetee a leoleo e le’o iai ni aiā tatau a lē ua molia ua aafia e faamuta e ono mafai ai ona faamuta le faaauauina o le suesueina o le moliaga ua tuuaia ai Talalelei Pauga.
Ua tālia nei leisi valaauga o le mataupu o le a tali ai lē ua molia ma ana loia i le tetee a leoleo ma iloa ai se aso e faia ai folasaga a loia o itu auai ma taualuga i le faia o se faaiuga o le a iloa ai le talia ma le teena o le talosaga a Talalelei.
