Ua ave i le Sosaiete a Loia i Samoa le tuualalo e ala i se fautuaga malosi mai le Lesitala o mataupu tau faamasinoga, o le Ofisa Sili foi o pulega o lea auaunaga tāua a le Malo, ina ia ave se leo i o latou sui o loia e tausisia ma usitai i le faatinoina o o latou tiute i le faamasinoga, e pei ona aiaia i le tulafono a loia ma le faatinoga o a latou galuega poo le Lawyers and Legal Practice Act o le tausaga e 2014, lea o loo maioio ai se aiaiga e faatatau pe faasino i amio a loia uma i le atunuu.
Ua mafua lea faamanatu mai le lesitala o faamasinoga ona ua matauina i le amataga o galuega o lenei tausaga se amio a se tasi o sui o le sosaiete o le lē auai i le fofogaina o faamasinoga o loo ia tauaveina, e aunoa ma le faailoa i le faamasinoga o lona lē auai, aemaise o lona le tapenaina o se isi loia sinia e tauaveina ana mataupu pe afai ua lē paau atu ona o ni tuatuagia poo sana malaga e tuua ai le atunuu.
Ua taunuu ai i le laulau a le Peresetene o le sosaiete a loia a Samoa se finagalo tusitusia o le Lesitala ua faaleo ai ona atugaluga ma faaolooloma’au ai foi i le Peresetene ma le fono faatonu a le sosaiete, ina ia ave se fautuaga i ona sui.
