Ua savali nei i le 2 masina o galulue pea le Matagaluega o Leoleo e saili le taavale na uma ai le ola o se alii talavou i Vaitele i le Aso 21 o Aperila ia Tuuau Maletino.
O lenei faalavelave na tulai mai i le vaveao o lea aso ma ua faamauina o se ‘Hit and Run” ma talu mai le faalavelave o lei maua lava ni faamatalaga mautu e ono iloa ai le tagata na faia lenei soligatulafono.
Ua talosagaina ai nei e le Matagaluega le fesoasoani a le mamalu o le atunuu mo se tasi na te silafiaina se taavale o le ituaiga o le Nissan Elgrand Van, Nissan Delica Van poo le Toyota Toyoace Van lanu pa’epa’e, poo se tasi foi sa ia vaaia lea ituaiga taavale i se vaega e lē mamao ese mai ma le vaega sa tulai mai ai lenei fa’alavelave ina ia logo mai le Ofisa o Taavale Afi i le telefoni 26712 poo le telefoni 22222 laina 104 poo le imeli info@police.gov.ws.
Na fautuaina foi e Leoleo le mamalu o Samoa o le tele o fa’amatalaga lē fa’amaonia o loo fa’apea ona tuuina i luga o upega tafa’ilagi o loo lepetia ai le fa’amautuina o molimau moni o lenei mataupu. O fa’amatalaga uma foi ua fa’aooina mai i le Matagaluega ua maea ona fa’atino iai suesuega masani.
I se faatalatalanoaga a le Tusitala ma matua o Tuuau Maletino na faali le mafatia o le loto ona o le faalavelave na tulai mai ua uma ai le ola o si la alo ma ua tatalo foi le aiga i lē na faia lenei tulaga ina ia salamo loa ma agai i le Matagaluega o Leoleo.
