Ua faatalosagaina le aveesea o poloaiga o loo faamalosia ai tui o i latou ua taua o support workers i le soifua maloloina sei fesoasoani ai i le toagaogao o le aufaigaluega.
E tusa ma le 700 tagata faigaluega maualuluga tomai ma agavaa nei a le soifua maloloina e toe foi i galuega pe a aveesea lea poloaiga.
Ua talosaga ai le New Zealand Health Group agai i le malo e faamuta ia, ona ua moomia tagata faigaluega nei e lei faia tui ina ia toe foi mai.
Molimau ai le pule sili o lea faalapotopotoga i tala a le Herald, Josephine Gagan, e tusa ma le 14,000 i le 16,000 itula i le vaiaso e mafai ona maua mai pe a foi mai lea aofai ma o se faamama avega tele lea.
Ae i se tali mai le ofisa o le minisita o le Koviti Dr Ayesha Verrall i le mafuaaga o loo faaumiumi ai pea ona faamalosia tui mo tagata galulue nei, e leai se isi tala faaopoopo i le faaiuga ua mae’a fofoga mai e le palemia Jacinda Ardern.
O le asō e tusa ma ripoti o le a fono ai le kapeneta ma iloa ai le tonu o le traffic light system a Niu Sila faapea ai ma isi tulafono o le Koviti e aofia ai talifofoga ma atonu e ono sau ai pe talia le talosaga e faagata ai le poloaiga o loo faamalosia ai pea le faia o tuipuipui o support workers lea e tele ina galulue i tua i le komiuniti.
