Ua iai nei se talosaga mai alii ma faipule o le nuu o Afega ua faaulu i le Faamasinoga Maualuga, ua latou lu’i ai le poloaiga ua faia e le faamasinoga ma ua finau ai Afega e aveese le poloaiga.
O le valaauina o le moliaga o le le usitaia o lea poloaiga e ala ise talosaga a Leauvaa, na faailoa ai e le afioga i le Faamasino Sili le talosaga a Afega ua faaulu atu e aveesea ai le poloaiga poo le interim injunction.
O taualumaga foi a le faamasinoga i le Aso Lulu o le vaiaso nei sa faatulaga e suesue ai tuua’iga o le lē usitaia e Afega o le poloaiga, na faailoa ai e le loia a le nuu o Leauvaa o loo faaauau pea ona lē usitaia e Afega lea poloaiga ona o loo faatino lava nisi o a latou galuega, e pei ona amata faato’a nisi o fanua ma ua faaaogā ai ma le vailaau fanavao i nisi o laautoto.
O le ta’ua o le faaaogā o le vailaau fanavao na faaalia ai ni atugaluga o le Faamasino Sili.
Talu ai ia tulaga ua faailoa i le faamasinoga ua faia ai le faaiuga a le Faamasino Sili le afioga Satiu Simativa Perese, e tolopo le suesueina o tuua’iga o le lē usitaia e Afega o le poloaiga i le aso 5 o le masina fou o Iuni, ae tuuina atu le avanoa i le loia a Leauvaa e tapena atu ai ni tali i tuua’iga fou ua faailoa atu.
O le avanoa foi lea e tuuina atu ai se tali tusitusia a le loia a Leauvaa i le talosaga a Afega e aveese le poloaiga ua taofia ai galuega i o latou fanua.
O le Aso Lulu asau e tatau ona taunuu uma ai i le faamasinoga tali tusitusia mai loia a ia afioaga, ona sauni ai lea e suesue faatasi moliaga o le lē usitaia o le poloaiga ma le talosaga e aveese le poloaiga, pe a toe tauaofia le faamasinoga mo lenei mataupu i le Aso Lulu le aso 5 o Iuni.
