Ua lapata’ia mai nei e le Ofisa o le Soifua Malōlōina le mamalu lautele i le telē o le avanoa ua sasao ai i tua le pepesi o le faama’i o le misela, ina ua faamaonia le aafia o ni tagata se to’afā i lenei vaiaso – e aofia ai ni tamaiti se to’alua.
I faamaumauga e tusa ai ma lipoti mai le leitio faavaomalo i Niu Sila nei, mai iā i latou ua faamaoni le maua i le faama’i, o le to’alua e mai Manawatū, to’atasi mai Nelson, ma le isi mai Aukilani.
Faamanino e le tasi o foma’i, Dr Sharon Sime o le Heath NZ, o le to’atolu o i latou ua mama’i e le’i faapea na fesoota’i atu i nisi sa faimalaga i fafo; o lona uiga e iai le talitonuga o loo iai tagata o loo lotolotoi ma le to’atele o loo maua i le ma’i ma le lē iloa ua aafia i le misela.
O loo faasolo su’esu’ega i nofoaga o loo masalomia ua pepesi ai le faama’i, ma ua faailoa mai o le a su’esu’e ia nofoaga i se taimi o i luma mo le silafia e tagata.
Ua faailo e le tamaita’i foma’i ia Sharon Sime ona popolega i le matāupu, ma ua ia fautuaina malosi ai nei le mamalu lautele ina ia faaeteete.
O lenei ma’i o le misela e vave lava lona pepesi i tagata (highly contagious) ma afai ae aafia ai se tasi, e iai le avanoa e fetaia’i pea lea tagata ma aafiaga i lona soifua mālōlōina i le tele o taimi o i luma (long-term health issues).
Faamanatu foi Sime i tagata ina ia mataala ma ia mata’itūina āuga o le misela, e aofia ai le maualuga o le fiva, o le tale, mūmū mata, tafe le isu.
Ta’ua foi le tāua tele o le faia o tuipuipui, auā e na o le pau lava lea o le fofō e tali atu ai i le aafia i le faama’i.
I faamaumauga, o loo maualalo pea le numera o tagata ua fai tuipuipui o le misela.
Ta’ua e Sime, o loo iai le faanaunauga ia oo atu i le 95% le to’atele o tagata e faia tuipuipui ina ia taofia ai le pepesi ma le sasao atu o le faama’i.
Puna o Faamatalaga: https://www.rnz.co.nz/news/national/576590/strong-likelihood-measles-spreading-in-the-community-officials-warn
