O le amataga o lenei vaiaso o le a maua ai se feiloaiga a le vasega o tusitala ma le aufaasalalau i Samoa ma le siamupini o le fusi o le IBF i le paga o le cruiser weight o Jai Opetaia mai Ausetalia, o le a fofola ai le fala ae talanoa ai lea tamafanau a le atunuu, i le tulaga maualuga ua taunuu iai lona taumafai i le taaloga o faipelega.

O le Aso Faraile ua mavae na taunuu ai o ia i le faamoemoe e auai i polokalame o faafiafiaga o le 60 tausaga o le tutoatasi, ma mafuta atu foi i le pulega o faipelega a Samoa a o faagasolo i le vaiaso nei le taamilosaga fusu i le va o Samoa ma Amerika Samoa.

O le taamilosaga lenei e faia i tausaga uma i le taimi o le Teuila peitai ua lua tausaga o taofia ona o puipuiga o le faamai.

O le Aso Toonai na tea nei sa savalia ai le taulaga i Apia e aufusu o loo tausinio i le taamilosaga ma faalauiloa ai foi le alii o Jai Opetaia.