Ua tapena ai nei le Ekalesia Katoliko i Samoa e tali le fonotaga lona lima a le Ituaiga o Iesu Agaalofa Mamana i le Lalolagi mo le taimi muamua lenei.
Na faaalia e le komiti o loo gafa ma le tapenaga e faapea o le aso 20 i le aso 26 o Me o le tausaga nei o le a faataunuuina ai lea faamoemoe, o lona uiga toe 78 aso ona amata lea o le fonotaga.
Ua faailoa foi pe a ma le silia i le tasi le afe sui ua faamautu mai i le taimi nei o le a auai mai e aofia ai Ositaulaga, o Tamaitai Sa ma sui auai o lea Ituaiga i atunuu eseese o le lalolagi.
O Samoa le atunuu mai le Oseania na filifilia mai i le fonotaga lona fā sa faia lea i Filipaina, lea sa auai iai le au fono e aofia ai ma le Taitai o le Ekalesia Katoliko i Samoa nei Afioga Akiepikopo Alapati Lui Mataeliga.
O le ‘auga o lenei fonotaga ia toe faaolaola le faatuatua o le tagata i le Atua i lona Agaalofa Mamana e pei ona iai le tupulaga Talavou mativa ae faatuatua, le tamaitai Polani o Faustina Kowlaska o lē na ia momoli mai le feau na tuufofoga atu e Iesu ‘O LE ATUA O LE ALOFA LAVA IA’ ma o le moana loloto o lona alofa lea e goto ifo ma galo ai agasala a le tagata.
O le fonotaga lenei o le a talimalo ai Samoa sa fuafua e faataunuu i le 2020 peitai o aafiaga o le lalolagi i le faama’i o le Koviti-19 na tuua mai ai ma o lea ua agai e faataunuu ina ua toe tatala ai tuaoi o atunuu taitasi.
O le uluai fonotaga sa faataunuu i Roma ma e silia i le 400,000 tagata sa auai, sosoo ai ma le fono i Polani, lona tolu ai le fono i Columbia, lona fa le fono i Filipaina ae o Samoa ua lona lima iai atunuu o le a faafofoga ma auai i le toe faamatalaina o le feau na momoli mai e Sr Faustina, e ala i le upu folafola, o faamatagala mai Ositaulaga, o molimau o le faatuatua faapea taulaga paia o Misasa o le a faataunuuina ai.
