O se va’a o fausaga o va’atele folau o tagata Maori o Niu Sila, e leai ni masini faaonapo nei e faatonutonu ai, ae faatonutonu lona alava’a i motu ma atunuu e malaga iai i le faaaoga o fetu, le masina o le matagi, o galu ma peau o le sami, faapea manulele o le gataifale, o le a afea le afioaga o Poutasi i Falealili i le Aso Lulu le ogatotonu o lenei vaiaso.
O loo faatautaia mai lea va’atele e ni tagata folau se toavalu ma o le autu, ia faaaoga le siosiomaga o le natura e tapasā mai ai lona alava’a e avea o se su’ega poo se test ina ia faamautū ai o latou tomai faatagata folau poo navigators.
O se vaa’tele folau mai le Te kura Waka i Tauranga ma o le aso 25 o Setema na tu’ua ai Niusila. Ua iai le faamoemoe e taunu’u i gataifale o Poutasi i le taeao o le Aso Lulu, ae o le va’afolau a Samoa le Gaualofa o le a agai e faafeiloa’i ma faafeao ane i uta lea va’atele folau mai Atotearoa Niu Sila.
Ua iai le faamoemoe e tasi le vaiaso o le a iai i Samoa le kapeteni ma le auvaa o lea va’atele folau mai Niu Sila ae o le Peresitene o le Aiga Folau o Samoa le afioga, Tuatagaloa Joe Annandale, o le a talimalo i le to’ai taunuu o lea vaa folau.
Ua faamoemoe e asia e le auvaa nisi o mataaga faapea le aoga o le Amosa o Savavau, ao lei toe tuaa le atunuu ma faaauau atu le folauga i le atunuu tuaoi o Tonga.
Ua faailoa i se pepa o faamatalaga o le tāua o mafutaga faapenei a le Aiga folau o Samoa ma lea auvaa e fetufaa’i ai silafia ma tomai i le faaaogaina o auala mai anamua sa folau ai i le vasa loloa tagata o le Pasefika.
E ui e leo faaaogaina e le va’atele folau mai Niu Sila ni masini faaonapo nei e faatonutonu ai lona alava’a, ae o loo iai le tapasā ma isi meafaigaluega uma mo le saogalemu ina ia ausia mana’oga o tulafono faavaomalo mo vaa e malaga i le sami.
