Ua maua le tonu po ua uma le case i le mataupu sa tau falo ai le NRL i le nofoaga o le a faia ai le final o le taaloga i le tausaga nei ma ua mautu mai o le Accor Stadium i Sini.
O se mataupu sa finau ai Niu Sa Uelese ma Kuiniselani a o lea ua faalauiloa mai le faai’uga a le Komisi o le a toe nofo ai le taaaloga i Sini e ui e ititi le tupe na ofoina ane mo le faamoemoe e faatusa i le ofo a Kuiniselani.
O le ta’ita’ifono o le ARLC, Australian Rugby League Commission o Peter Vlandys ua ia ta’ua o se faai’uga faigata tele lenei mae sa toe sii i luga le ofo a NSW ma ua faamaonia ai le tausaga e tasi o le maliega lea ma le faigamalo a NSW.
Na ia ta’ua foi o loo avanoa foi le tausaga fou ia e mafai foi ona toe tauofo ai. Na mafua ona fai ma finauga le mataupu lea ina ua lē fiafia le NRL ina ua toe faasilasila e le premier o NSW Dominic Perrottet i se taimi e lei mamao atu, o le tupe sa folafola muamua mo le faaleleia o malae taalo i Sini o le a toe faaaogā ane e fesoasoani mo aafiaga o lologa i le setete.
Fai ai loa ma le faatatau o le a suia se isi nofoaga e faia ai le finals o le lakapi liki lea la ua foliga mai ua maua ai ma le avanoa a le NRL e faatauofo ai setete e talimalo i ia faamoemoe ma o le setete lava e tele lana ofo, o latou ia o le a talimalo i finals o le liki i lena foi taimi.
