Ua aumai le faai’uga a le laulau o faamasino e to’atolu o le Faamasinoga o talosaga apili a le Faamasinoga Sili, ua talia le tuuina atu o le talosaga toe iloilo poo le apili a le tamaitai faipule o nofoa faaopoopo o tamaitai i le Palemene le afioga Aliimalemanu Alofa Tuua’u ma isi e su’esu’eina ma faia iai se faai’uga.
Ua talia ai foi ma le apili tali poo le cross appeal mai le afioga i le tamaitai faipule o nofoa faaopoopo lava o tamaitai i le Palemene le afioga Toomata Norah Leota, faasaga i le filifilia o Aliimalemanu Alofa Tuu’au ma le tasi o faipule tamaitai o nofoa faaopoopo le afioga Faagasealii Sapoa Feagia’i. Ua talosaga ai foi Toomata Norah Leota ma lana loia e toe su’esu’e ai ma le aiaiga o le tulafono 441A o le Tulafono o Faigapalota e faasino i le auala poo le fomular e saili ai le 10 pasene e maua ai le ono o nofoa o tamaitai i le Fono Aoao Faitulafono.
O le taliaina o nei talosaga e le faamasinoga apili ua tapena ai nei itu auai o lenei mataupu ia latou folasaga ma finauga faaletulafono e tuuina atu mo su’esu’ega atili ma aumai ai se isi faai’uga o le a tatou iloa ai le talia ma le teena o ia finauga. Mo le silafia na aumai le faai’uga a le faamasinoga sili i le masina o Me ma poloaina ai le Fofoga Fetalai o le Palemene, ia faatauto sui faipule tamaitai e to’atolu le afioga Aliimalemanu Alofa Tuu’au, Faagasealii Sapoa Feagia’i ma Toomata Norah Leota. O le tuanai o lea faai’uga na mulimuli ane ai i masina na sosoo ai o Iuni ma Iulai ae faatō’ai le talosaga apili a Aliimalemanu Alofa ma isi faasaga i le filifilia e le faamasinoga o le afioga Toomata Norah.
O le masina o Novema o loo fuafua e fofogaina ai talosaga apili a itu auai o lenei mataupu pe a tauaofia le Faamasinoga o Talosaga toe iloilo poo le faamasinoga apili a le faamasinoga maualuga a le atunuu. O le afioga i le Faamasino sili, Satiu Simativa Perese, le afioga i alii faamasino sinia, Vui Clarence Nelson ma le afioga Lesatele Rapi Vaai, sa seei i le iloiloina o nei talosaga apili e pei ona talia le tuuina atu mo se isi sailiiliga ma faia iai se faai’uga.
