O le po ananei lea ua sau ai lapataiga e oo mai ai le uluai afā o lenei tausaga i Niu Sila.
O le afā ua faaigoaina o Cyclone Hale o loo fuafua o le a tele ina tigaina ai le North Island i vaega e iai Coromandel a o lei faasolo atu i Waikato, Taupo ma Hawkes Bay.
E tuufaatasia tala o le taeao ua mae’a ona sau lapataiga mo Gisborne, le Penisula i Coromandel faapea Hawkes Bay mo le aso a taeao ma le Aso Lulu.
O lea ua toe sau isi lapataiga ma fautuaga e tapenapena ae o lea lava foi o loo tau faamamā le tele o le palapala solo ma lologa na tigaina ai Coromandel mai le vaiaso faatoa uma atu.
I uiga louloua o le tau ananafi, ua lipotia mai le lē taunuu o faigamalaga a vaa feoai i le sami i Ueligitone i le aoauli faasolo mai i le afiafi, atoa ai ma le lē mafai ona alu ese mai o le meli tele sa taula i Ueligitone na faamoemoe e alu ese i le taeao ananafi, peitai ona o le mamafa o timuga faapea le malolosi o savili na le mafai ai.
I le taliu mai i Aukilani o lea ua sau tala mai le Waka Kotahi i avetaavale ia lava le onosai ma tapena e ono poloka le State Highway 1 i le feoai ai i le va o Bombay ma Manukau ona o le toe foi mai o le toatele sa o mo tafaoga o le Kerisimasi ma le Tausaga Fou.
O le fautuaga mai le ofisa vaaitau ia tulimataia pea lipoti o loo tuuina mai atoa ai ma tapena ina ne’i motusia le eletise.
