Ua tatala nei faitoto’a o se isi auaunaga e maua ai fesoota’iga televavave o le initaneti ua faaopoopo ai i isi foi pisinisi tau fesoota’iga i le atunuu.
O le kamupani o le Space X ua faamatuu iai le laisene e mafai ai ona faagaioi i le atunuu le Starlink e maua ai le initaneti lea ua faamatalaina i se pepa o faasalalauga o se fesoota’iga faaonapo nei e sili atu ona saoasaoa.
O le faai’uga o le vaiaso na te’a nei na faailoa ai e le ofisa o le Pule Faatonu poo le Regulator le talia ai e le Malo o lea auaunaga fou ina ua faamaonia e ala i se ioega a le Kapeneta.
E pei ona silafia talu ona faaulufale mai i le atunuu masini satelite na aumai e nisi ma lea fesoota’iga sa fautuaina e le Pule Faatonu e avatu masini e laisene ona o le taimi lea e le’i faatagaina.
O lea la ua faamautū le talia e le Malo o lea auaunaga ma ua mautū ai foi ma pisinisi tau fesoota’iga i le atunuu e pei o le Digicel ma le Vodafone ua iai le ioega a le kamupani o le Space X latou te faatinoina le faatau i le atunuu o fesoota’iga mai le Starlink.
O kamupani foi o le Computer Service Limited poo le CSL ma le Bluebird Lumber ua iai le faatanaga a le Space X latou te faagaioia ai le tuuina atu o le latou auaunaga tau fesoota’iga i totonu o Samoa.
