O loo faatali foma’i i Niu Sila se’i pē lelei le manu’a o le ta’otoga o se tasi o aao poo vae o le alii Palemia susuga Laaulialemalietoa Leuatea Polataivao Fosi Schmidt, ona faato’ā mafai lea ona tuua Aotearoa ae toe taliu mai i Samoa.
O le māfua’aga lea o le toe talosagaina e foma’i o le faaauau pea ona faamautū i Niu Sila o le ta’ita’i o le Malo ma ua lē taunuu ai ona foi mai lana siiga gasegase i le Aso Sa ua te’a atu nei le aso 19 o Oketopa e pei ona sa faailoa muamua.
O le siiga gasegase a le Palemia e pei ona silafia sa totogi e lona aiga ae lē o le malo e pei o aga masani o se siaki faafoma’i ma se togafitiga faafoma’i o le ta’ita’i o le malo e faatino, ma o se isi lea o fesili sa tāpā ai se finagalo o le Sui Palemia i le feiloa’iga ma tusitala i le Aso Faraile ua mavae.
Le afioga Toelupe Maoiautele Poumulinuku Onesemo o le Sui Palemia.
