Ua faamalieina le afioga i le Ao o le Malo le afioga Tuimalealiifano Vaaleto’a Sualauvi II ina ua mae’a ona felogona’i ma le Kapeneta e ala i le faai’uga FK (25) 36, o loo iai se faalavelave faafuase’i mamafatū ua oo mai ma ua ono lamatia ai le olaga tau tamaoaiga o le atunuu e māfua mai i le leai o se malosi’aga faaletulafono e faatagaina ai le faamatuu atu o tupe mai le faaputuga tupe a le malo e māfua i le lē pasiaina o le tulafono tau faaofi o le faatatauina o tupe mo le tausaga faaletupe 2025 i le 2026.
Ua faailoa e le Minisita o Tupe o tauaveina tiute o le Palemia, le afioga Mulipola Anarosa Ale Molioo, o le poloa’iga o faalavelave faafuase’i mai le Ao o le Malo, o le a tapena ai loa se fuafuaga tau tupe faanatinati i lalo o le Vaega 105 o le tulafono faavae, a o lumana’i ai le faataatia i le laulauafono a le Palemene o le tala autū o le tupe mo le valu masina o loo totoe o le tausaga faaletupe o loo faagasolo e amata i le masina fou o Novema ae mae’a i le faai’uga o le masina o Iuni o le tausaga fou.
A oo atu ai i lena taimi ua tapena le tala faatatau autū o le tupe fou e amata i le taimi masani o le masina o Iulai o le tausaga fou lava 2026.
Lona uiga o le a toe foi ai fuafuaga tau tupe a le malo mai lena masina i tulaga masani.
Le afioga Mulipola Anarosa Ale Molioo o le Minisita o Tupe, o loo ia tauaveina foi i le taimi nei tiute o le afioga i le Palemia o loo toesea ona o siiga gasegase i Niu Sila.
O le aso 6 o le masina nei o Oketopa o le a tauaofia ai le Palemene mo le faataatiaina o le tala autū o le tupe.
