Ua talia e faiaoga o aoga amata le ofo fou o totogi ua tuuina mai.
O lea ua mae’a le palota a faiaoga o aoga amata e talia le ofo o loo sau ai le siitaga o o latou totogi i le va o le 11.1% a le 13..9% mo faiaoga o loo i le iuni, ma o lea foi o le a faaopoopo le totogi aupito i maualuga mai le $90,000 o loo iai nei o le a tuu i luga i le $100,000 ae e lei uma Tesema o le 2024.
O le ofo ua mae’a talia e faiaoga o le a faaopoopo ai foi aso ma’i poo sick leave i le 15 aso.
O le uluai taimi lenei ua tetee ai faiaoga o Aoga Amata ona o o latou totogi e pei ona sa tetee faatasi uma ai ma faiaoga o aoga tulagalua ma kolisi maualuluga.
A o talia ai la e faiaoga o Aoga Amata le ofo fou mo o latou totogi, ae o loo teena pea e faiaoga o aoga tulagalua le ofo mai le matagaluega o aoga ma le latou finau, e le o lava totogi ma e le o faamalieina lava i latou i suiga faaopoopo e pei o taimi o aoaoga ma le aofai o le aufaigaluega e gafa ma fanau.
Ua fai mai ai le sui o le matagaluega o aoga, o se faanoanoaga le lē talia e faiaoga o aoga tulagalua o le ofo fou na toe aumai.
