O se fonotaga tāua tele ua faia i totonu o Niu Sila talu mai le Koviti, ma o lea foi ua aloaia ai ma le ofi mai o Peretania i totonu o le Comprehensive and Progressive Agreement for Trans-Pacific Partnership.
O le fonotaga lenei na faia i Aukilani ma o lea na matuai mamalu leoleoga a leoleo a o lei potopoto ananafi.
O le faiga faapaaga lenei ua faapuupuuina o le CPTPP ma o loo iai i totonu atunuu Pasefika e 11 e aofia ai ma Niu Sila.
O le ofi mai o Peretania o le uluai taimi lea ua sau ai se isi atunuu ese atu mai le li’o a le Pasefika, e pei ona iai o Peretania o le sui o le G7 ma o le atunuu lona 6 i le faatulagana o tamaoaiga o atunuu eseese.
Fai mai le Palemia o Niu Sila Chris Hipkins, o le ofi mai o Peretania o se fiafiaga tele lea ona o le a fesoasoani tele i tagata Kiwi o loo toe faatau atu oloa i fafo.
Na ta’ua ai e Hipkins, o le a tatala ai le faitotoa mo isi manuia e sasaa mai i le tamaoaiga o Niu Sila a o fefaatauai atu ai i atunuu mamao.
O Peretania o lea na faatalosaga mai e fia sau ma o lea ua talia aloaia, peitai o isi atunuu e aofia ai Saina ma Taiwan e moni o lea na faatalosaga mai peitai o loo taofia i le taimi nei se’i tālia se faaiuga a sui auai o le CPTPP.
