E teena e Scott Morrison le manatu e faapea e le’i ia te ia le to’a e faailoa atu ai ia i latou sa o latou galulue, gaioiga na ia faia. O le feiloa’iga a Morrison ma tusitala i le asō ua faailoa ai lea faamatalaga e lē sa avea ma Palemia o le atunuu i le taimi ua tuana’i. 

E to’atele ua valaau ina ia faasee ese Morrison mai le nofoa o lona itumalo, ona o lona aafiaga i le mataupu lea sa avea ai o ia ma minisia o isi matagaluega a o tula’i mai i le tofi e aunoa ma se iloa e i latou o loo latou faigaluega faatasi aemaise le lautele. 

Fai mai Morrison i lea faatalanoaga o le a faia pea lana auaunaga i lona itumalo ae o le a faailoa foi ma faia sana faai’uga i se taimi talafeagai ia te ia pe toe momo’e i le palota pe leai foi mo le itumalo o Cook. 

Ua faailoa foi e Morrison o le a ia lē faailoaina ni faamatalaga e faatatau i le la feutana’iga ma le Kovana Sili i le mataupu lea, ae pau le itu e fia faailoa, sa talia e le Kovana Sili le fautuaga a le faigamalo sa tulai mai i le tofi i lea taimi ma faatino ai ona tiute e pei ona mana’omia ai.  

O le kovana sili na sainia le faatautoina o Morrison i ia tofiga ua tapisa ai nei.