Ua aumai se finagalo o le Sui Palemia e tali atu ai i se finagalo faalaua’itele o lē sa avea ma Palemia o le ta’ita’i o le patī faaupufai o le Samoa ua Potopoto, i le faapea mai ua vaetama e le faigāmalo fou le fuafuaga o le tala autū o le tupe na teena e le Palemene e pei ona sa tutū faatasi ai le 20 o faipule o le Faatuatua i le Atua Samoa ua Tasi, ma sui faipule sa avea ma Itu Agai o le paea’iga 17 a le Palemene ua faatā’ape.
Sa faailoa e le afioga Fiame Naomi Mataafa i sona finagalo faalaua’itele o faiga faavae autū poo key policies o le tala o le tupe na teena ua vaetama ma faaaogā i le tala autū o le tupe o le a amata talanoaina i le Palemene i le Aso Lulu o lenei vaiaso.
Sa tāpā se finagalo o le Sui Palemia le afioga Toelupe Maoiautele Poumulinuku Onesemo i le feiloa’iga ma tusitala i le faai’uga o le vaiaso ua mavae.
O le talanoaina o le tala faatatau autū o le tupe e pei ona amatalia ai taualumaga a le fono aoao faitulafono i le ogatotonu o lenei vaiaso, ua faamoemoe e tatau ona mae’a ma pasia i le Aso Tofi o le vaiaso a sau, le aso 30 o le masina lenei o Oketopa.
O saunoaga faalaua’itele faataupou a sui faipule o le taimi muamua lenei ua seei ai i tofi o latou itumalo, o le a folasia i taualumaga a le palemene ua faagasolo.
