A o iai minisita Niu Sila i Ausetalia mo fonotaga i le asō, ua lipotia o le puipui lona lua poo le Pillar 2 o le maliega o le AUKUS lea o loo tatai iai le vaai a Niu Sila.
O se tasi lea o vaega tāua o le feiloaiga a le minisita o puipuiga a Niu Sila, Judith Collins faapea le minisita o puipuiga a Ausetalia.
Tautino Collins i tusitala Ausetalia o lea o loo manao Niu Sila e faatasi atu i le maliega faia toatolu a Ausetalia, Peretania ma Amerika lea o loo afifi ai faiga faaniukilia ma le puipuiga o tuaoi o atunuu tetele nei e tolu peitai e lē o le maliega atoa ae ua na o le Pillar lona lua.
E lē faate’ia auā o lea lava foi na agai iai le finagalo o le Palemia o Niu Sila, Christopher Luxon i le itu lava lea e tasi ina ua faimalaga i Ausetalia mo le uluai taimi i le tausaga talu ai.
O le Pillar lona lua o le maliega a le AUKUS o loo sau ai faiga faatekonolosi mo le militeli e aofia ai drones.
Na lipotia e le leitio a Niu Sila ae e lei malaga le minisita ia Collins faatasi ai ma le minisita o le va i fafo, Winston Peters i Ausetalia i le malaga o loo iai nei, ua faitau masina talu ona auiliili e sui o le malo itu tau puipuiga penefiti o le alu o Niu Sila i totonu o le AUKUS.
