O le faatonu o le ata lauiloa i le taimi nei a le Moana 2 ia Dana Miller, o se tamaitai Samoa e mitamita i lona tupu’aga, e pei ona iai lona faanaunauga ia to’atele atu ni tagata Pasifika e galulue ai i lea galuega. 

O lea ata faagaioi a le Disney, poo le animated Disney,  sa tulaga muamua i pepa alumia i le matamataina i le faai’uga o le vaiaso lona lua o le faaaliga faalotoifale i Amerika i le maua ai o le $53 miliona e tusa ai ma le faavasegana a le falepu’eata. 

I le taimi nei ua faatulagaina i le $300 miliona ua maua ai i totonu lava o Amerika, ma ua pasi mamao ai ma le ata muamua o le Moana pe a fua atu iai, i le kelope i le taimi nei ua pasia le $600 miliona ua maua mai ai.

I le polokalame a le Pacific Wave a le Leitio Niu Sila Pasifika, sa faatalatalanoa ai Dana Miller e tusa ai ma le uiga o lea ata ia te ia. 

Sa ia faaalia ai, sa ola ane i California, lea e to’atele ai tagata Samoa e faamautū ai. 

O lona tamā na fanau i Apia, o le tinā o lona tamā e sau mai Faga i Salafai, ae o le tamā o lona tinā e sau mai Pago Pago i Amerika Samoa. 

Na faaalia e Miller, e ui lava o le fatu o lea ata o le Pasifika, ae ia te ia, o le fatu autū o le vaaiga lautele.

Ma ia ta’ua ai, o lea ata e faatatau i se tamaitai talavou i le 16 o ona tausaga, ae e ui lava sa ia iloaina i lea taimi lona tupu’aga, ae o le 19 o ona tausaga, sa ia toe iloa ai e tele naunau ni mea e ao ona ia a’oa’oina a o tuputupu a’e. 

Aemaise ai le malamalama i le mea tonu e sau ai o le Pasifika, ma le lelei e moomoo ina ia iai ma se tulaga tāua tele e iloa ai i tatou o tagata o le Moana. 

O se tasi o itu tāua i lea ata, o le selau pasene o le agavaa e mafai ai e tagata Pasifika ona faamatala a latou tala i se tulaga maualuga e tauala atu i ata, aemaise aganuu, e iai le loto maualalo, ma lona uiga e avea ai ma se sui o le nuu. 

Sa ia faalototeleina foi tagata Pasifika e galulue i nei galuega faatonutonu ata, auā e leai se isi e tuuina atu se avanoa ia te oe, se’i vaganā ua e finau lava oe mo sea avanoa.